मुंबई | काही दिवसांपूर्वी गुगलच्या नव्या एँड्रॉईड ऑपरेटिंग सिस्टिमला लस्सी हे नाव देण्यात यावं यासाठी आयआयटी खरगपूरच्या आयआयटीयन्स मोहीम हाती घेतल्याचं वृत्त तुम्ही वाचलं असेलच.

लस्सीची लोकप्रियता यावरून पुरेशी सिद्ध व्हावी. देशभरात सर्वत्र लस्सीचे अनेकाविध प्रकार मिळतात आणि प्रत्येक ठिकाणाची खासियत आपल्याला त्याची लज्जत चाखल्यावरच कळते. असो आता मुंबईतच अनेक उपनगरांमध्ये लस्सीची खास अशी लोकप्रिय ठिकाणं आहेत त्यासंदर्भातील हा खास लेख.

दादर पूर्वेला कैलाश मंदिरची लस्सी मुंबईकरांमध्ये लोकप्रियतेच्या बाबतीत अढळ स्थान टिकवून आहे. अगदी साध्या पंजाबी लस्सीपासून ते बदामपिस्ती, केशर, महाराजा, सम्राट, मॅगो आणि शुगरफ्री अशा विविध स्वादातली लस्सी इथे उपलब्ध आहे. कैलाशच्या लस्सीचे वैशिष्टये म्हणजे ती इतकी दाट असते की ती चमच्याने खावी लागते. अगदी छोट्य़ाखानी जागेत लोक दाटीवाटीने लस्सीचा आस्वाद घेताना पाहयला मिळते.

दादर पश्चिमेला स्टेशनजवळ श्रीकृष्णची लस्सीही अशीच लोकप्रिय आहे. एका अरुंद बोळवजा जागेत आडव्या बाकांवर लोक लस्सीची चव चाखताना दिसतात.

गोगा डेअरीचे नाव तुम्ही ऐकलं आहे का? नसेल तर सांताक्रूझ पश्चिमेला रेल्वे स्टेशनच्या अगदी नजीक गोगा डेअरी आहे. गोगाच्या लस्सीची चव एकदा तुम्ही चाखून बघाच. अवघ्या तीस रुपयात अतिशय घट्ट आणि ताजी लस्सी आणि त्यावर चेरी वा क्या बात है…लस्सीचा ग्लास पाहता क्षणीच ती कधी एकदाची संपून टाकतो असं होतं.

विलेपार्ले रेल्वे स्टेशनसमोर पूर्वेला अवघी १६ रुपयात व्हॅनिला, रोझ आणि मॅगो अशी तीन स्वादात लस्सी मिळते. लोक ही लस्सी पिण्यासाठी प्रचंड गर्दी करतात. स्वस्त आणि मस्त अशी यथायोग्य ओळख या लस्सीची आहे. विलेपार्ले पूर्वेलाच पणशीकरांकडे मिळणारी मॅगो लस्सी चव आणि दर्जाच्या बाबतीत सरसच म्हणावी लागेल.

मालाड पश्चिमेला एमएम मिठाईवाल्याकडे साधी आणि केशर लस्सी मिळते. एमएम की गाढी लस्सी अशी लाऊडस्पीकरवरुन दिवसभर या लस्सीची जाहिरात सुरु असते. साधारणता तीस ते चाळीस रुपयात मिळणारी लस्सीचं वर्णन लाजबाब या एका शब्दात करावं लागेल.

कांदिवलीला श्रीराम स्वीट्सकडे मिळणारी लस्सीही दर्जाच्या बाबतीत नंबरवन आहे. साधी आणि केशर अशा दोन स्वादात ही लस्सी मिळते.

मुंबई | लोअरपरळ आणि लालबाग दरम्यान गणेश गल्लीजवळ मुंबई ‘लाडूसम्राट’ हे हॉटेल आहे. या हॉटेलातील वडा चटणी प्रसिद्ध आहे.

भारतमाता सिनेमाजवळ गेल्यावर तुम्हाला लाडूसम्राटचं सहज दर्शन होवू शकतं.

लालबागच्या गणपतीच्या दर्शनाला तुम्ही कधी गेले, तर लाडूसम्राटला जरूर भेट द्या. लाडूसम्राटवर सतत वर्दळ असते, म्हणून जरा दमानंही घ्यावं लागेल.

लाडू सम्राटचा वडा खाण्याचं वेड ;लाडूसम्राट’ने मागील 25 वर्षांपासून खवय्यांना लावलं आहे. या वड्या बरोबर लाल आणि पांढरी चटणी मिळते. या चटणीमुळे या वड्याची टेस्ट काही औरच असते.

लाडूसम्राटमध्ये जैन वडाही मिळतो, हा वडा फक्त रविवारी मिळतो.

लाडूसम्राटमध्ये अनेक प्रकारच्या मिठाया आहेत. आंब्याचा सिझन असला की इथली आमरस पुरीची चव चाखण्यासाठी गर्दी होते. लाडू सम्राटची कोथिंबीर वडीही प्रसिद्ध आहे.

उपवासाचा दिवस असो किंवा नसो, लाडूसम्राटमध्ये साबुदाणा खिचडीही मिळते.

लाडू सम्राटची बासुंदीही अनेकांना आवडते. लाडू सम्राटचं पियुषही प्रसिद्ध आहे. सर्वात महत्वाचं म्हणजे लाडूसम्राटच्या मिसळ पावनेही खवय्यांची मनं जिंकली आहेत.

स्वप्नाली अभंग | मुंबई पुण्यासारख्या शहरात टपऱ्या, हातगाड्या, खाऊगल्ल्या, मॉल्सची फूडकोर्ट असे विविध आणि मुबलक पर्याय उबलब्ध आहेत. पण भटकंती आणि बरोबरच मेजवानी असा दुहेरी आंनद देणाऱ्या मुबंईतल्या ’द मुव्हींग कार्ट’ या चालत्या फिरत्या अनोख्या रेस्टोरन्टची नुकतीच भर पडली. यामुळे आता अनेक विकेन्ड आणि सेलिब्रेशन्स भन्नाट होतील, हे वेगळ सागांयची गरज नाही.

मरीन ड्राईव्हवरचा क्विन नेकलेसचा नयरम्य नजारा आणि समोर वाढण्यात आलेली पंचतारांकीत व्यंजन ही या ’द मुव्हींग कार्ट’ ठळक वैशिष्ट्यं आहे. जर मोकळ्या हवेत आपल्या आवड्त्या व्यंजनांचा आस्वाद घ्यायचा असेल, तर तुम्ही या रेस्टॉरन्टच्या वरच्या मजल्याचा ऑपशन्स निवडू शकता.

लोअर डेक हा वातानुकूलीत असून नेत्रसुखद प्रकाश योजना आणि सौम्य संगीत यामुळे समोर आलेल्या पदार्थांची लज्जत आणखीणच वाढते. मद्य विरहीत कॉकटेल, सुप स्टार्टर, डेझर्ट, मेन कोर्स हे ही सगळं मरीन प्लाझा या हॉटेल मधून आलेलं. इंडियन आणि कॉन्टिनेटल असे पर्याय यात उपलब्ध आहेत.

‘द मुव्हिंग कार्ट’ दिवसभरात दीड तासाच्या तीन सहली करते. या सहलींचा पिक अप पॉईट हॉटेल मरीन प्लाझामधून असणार आहे. नरिमन पॉईट्ला वळसा घालून चौपाटी आणि पुन्हा मग परतून हॉटेल मरिन प्लाझा अशी मुव्हिंग कार्टची सैर असणार आहे.

यात शाहकारी आणि मांसाहारी अमर्याद १२ कोर्स मेन्यूंचा समावेश आहे. जागतिक दर्जाच्या सुविधा, स्वादिष्ट आणि भरपेट जेवण यामुळे मुव्हींग कार्ट मधला अनुभव संस्मरणीय ठरू शकतो.

या करीता तुम्हाला पूर्व नोदणी किंवा ऑनलाइन बुकिंग करणं आवश्यक आहे. अधिक माहितीसाठी तुम्ही http://www.themovingcart.com या संकेत स्थळाला भेट देऊ शकता.

संपर्कासाठी +91 8689904000, +91 9702624000

शाहकारी प्रतिव्यक्तीसाठी रूपये१२००, मासांहारी प्रतिव्यक्तीसाठी रूपये १४००

(‘मायसिटीमायफूड’चा उद्देश नवनवीन तसेच परंपरागत हॉटेल्सची माहिती तुमच्यापर्यंत पोहोचवण्याचा आहे. ऐन वेळेस येणाऱ्या अडचणी, अथवा सेवा-सुविधांचा दर्जा याबद्दल ‘मायसिटीमायफूड’ जबाबदार नाही)

(पद्मा शिंदे, कोल्हापूर ) कोल्हापूर म्हटलं की डोळ्यांसमोर उभी राहते, ती इथली संस्कृती आणि कला – क्रीडा परंपरा…

आखाड्यातला कुस्ती असो किंवा कलाकारांची कला, दोन्ही इथेच अनुभवावं. कोल्हापूर म्हणजे रांगडेपण, मात्र रांगड्या भाषेतही दडलंय अपार प्रेम.

कोल्हापूरला ऐतिहासिक आणि सांस्कृतिक महत्त्व आहे. कोल्हापूरी साज, चप्पल अशा वस्तू जगभरात ओळखल्या जातात. पण त्याचसोबत खास आहे ती कोल्हापूरची खाद्यसंस्कृती.

कोल्हापूर म्हटल्यानंतर सर्वात आधी नाव घ्यावं लागेल ते तांबडा पांढरा रस्सा. खास कोल्हापूरी स्टाइलचं मटण. तांबडा रस्सा म्हणजे फक्त झणझणीत तिखट असा अनेकांचा समज आहे.

थोडं जास्त तिखट आणि वर मिरची टाकली की झाली कोल्हापुरी डिश तयार असा शेट्टी – पंजाबी हॉटेलांनी गैरसमज करुन ठेवलाय. पण कोल्हापुरी जेवण म्हणजे तिखटपणा नाही तर ती एक चव आहे.

दगडी पाट्यावर वाटलेले मसाले वापरुन बनवलेलं झक्कास कोल्हापुरी मटण म्हणजे खवय्यांसाठी एक लज्जतदार ट्रीट. कोल्हापुरात अनेक ठिकाणी अशा लज्जतदार मटणाची चव तुम्ही चाखू शकता.

पद्मा गेस्ट हाऊस, पद्मा हॉटेलमध्ये तुम्ही तिखट नव्हे, तर चमचमीत मटणाचा आस्वाद घेऊ शकता. बाहेर हॉटेलमध्ये मटण खायचं म्हणजे टेन्शनच येतं. पण इथे फ्रेश डिश मिळणार याची खात्री आहे.

खिशाला परवडणाऱ्या किंमतीत उत्तम चवीच्या कोल्हापुरी मटणावर ताव मारायचा असेल तर पद्मा हॉटेलला नक्की भेट द्या.

कोल्हापुरात केवळ नॉनव्हेज खाणाऱ्यांचीच चंगळ आहे असं नाही तर शाकाहाऱ्यांसाठीही खूप सारे अॉप्शन इथे आहेत. मिसळीची खरी चव अनुभवायची असेल तर कोल्हापूरशिवाय पर्याय नाही. इथल्या मिसळीची अनेकांनी कॉपी करायचा प्रयत्न केला, पण इथल्या मिसळीची त्याला सर नाही.

मुंबईमध्ये शेट्टीच्या हॉटेलांमध्ये पांढऱ्या वाटण्यावर फरसाण पापडी टाकून मिसळ म्हणून सर्व्ह केलेल्या डिशला मिसळ म्हणायला जीभ वळत नाही. तोंडाला पाणी सुटेल अशी झणझणीत मिसळ खाण्यासाठी खासबाग हॉटेल, फडतरे आणि चोरगे मिसळ असे काही पर्याय तुमच्यासमोर आहेत.

या तीन ठिकाणच्या मिसळीच्या चवीत थोडाफार फरक आहे पण त्या चविष्ट आहेत हे नक्की. खासबाग मैदान परिसरात गेल्या 70 वर्षांहून अधिक काळपासून खासबाग हॉटेल आहे.

आधी टपरीवजा असणाऱ्या जागेच हॉटेलमध्ये रुपांतर झालं. गेल्या वर्षभरापूर्वी याच जागी नव्याने हॉटेलचा कायापालट करण्यात आलाय. पण चव मात्र तशीच…अगदी काटा किर्रर…

महालक्ष्मी मंदिर परिसरात फिरायला जायचं तर राजाभाऊंची भेळ ठरलेली. संध्याकाळी राजाभाऊंच्या भेळच्या स्टॉलवर असणारी गर्दीच या भेळीच्या चवीची महिती सांगते.

राजाभाऊंच्या पुढच्या पिढ्यांनीही हाच व्यवसाय पुढे सुरु ठेवलाय. मिरची आणि कैरीच्या जोडीने या भेळीची चव आणखी वाढते. रंकाळ्यावर अनेक भेळीच्या गाड्यांवर राजाभाऊ भेळच लिहिलेलं दिसेल.

मात्र याबद्दल विचाराल तर भेळवाला काहीही न बोलता फक्त हसेल हे नक्की. महालक्ष्मी मंदिर परिसरातली खाऊ गर्ल्ली आता केशवराव भोसले नाट्यगृह परिसरात थाटण्यात आलीये. इथे या चमचमीत भेळीची चव तुम्ही चाखू शकता.

एक ना दोन अशा अनेक पदार्थांची यादी इथे देता येईल. पण आज इथेच थांबते कारण लिहितानाही ती चव आठवून तोंडाला पाणी सुटतंय.

कोल्हापुरी जेवणाची चव तुमच्या जिभेवर खूप काळ रेंगाळत राहाते. तुम्ही खवय्ये असाल तर कोल्हापूरला नक्की भेट द्या.

‘तुमच्यासाठी काय पण’ ही कोल्हापुरी आदरातिथ्याची रित. त्यामुळे इथली अनेक हॉटेल्स तुमच्या सेवेसाठी नेहमी तयार आहेत. शेवटी जो चवीने खाणार त्याला कोल्हापुरी मानवणार.

(पद्मा शिंदे, ‘एबीपी माझा’च्या  पत्रकार आणि अँकर आहेत)